لعل السحاب اللي نشى ما لنوه حد
عن اقصي الوطاء ينهض دجى الليل براقه
من الارض ربانه يخالف عنه ويرد
طفافيح نوه كنها احوير الناقه
يشد انتباهك يا جريح المشاعر شد
على نور برقه تاخذ العين طوراقه
يمر الديار اللي لها وسط قلبي ود
لها النفس مع بعد المسافات مشتاقه
انا احبها واحبها والمحبه جد
صحيح المحبه داخل القلب حراقه
علي شان من حرك سكوني وعني صد
وانا ما حسبت حساب جفواه وفراقه
لهيب الفراق بداخل القلب ما يبرد
وانا ما لعيني بالسهر بعد ذا طاقه
انا اللي عطيته كل وقتي بليا عد
وانا اللي هديته من ورود الغلا باقه
قضي الوقت يالليل الشتاء والروابع ورد
اشيل الورود ويذبل الورد باوراقه
انا لو بغيت ارتاح ما طاب لي مقعد
انا لو بغيت اسج ما الرجل منساقه
الا يا عرب يا وجد حالي عليها وجد
غلاها قديم وكنه القلب بعماقه
اببعد وبيها كل لمحة بصر تبعد
ابقفي عن المقفي عسى فاله وفاقه
جفول المها اللي ما يعاود بعد ما مد
تذير بعد ما سدد الرمى تفاقه
ابي طرف عيني بعد طول السهر يرقد
والاسباب بس تعاود السهر لرماقه
تدور الليال وكل ما جابها يفقد
ولا للبشر يا كود ما راد خلاقه
"مدارات شعبية"