من على ليلاه غنى مواويله
تل قلبي لين غنت مواويلي
ذكر الخفاق غيداً تراعيله
الغلا واجد ولابه محاصيلي
في عيوني قبل ما تلبس الشيله
وبالخفايا عقب ما جات من جيلي
والله ان القلب منها تعاليله
آه من مابا الخفا يوم تطريلي
يتمزع خافقي يوم تبديله
الثلاث السود بين القناديلي
في هدبها رمح مسلط مداخيله
في طلال وصبحهم كنه الليلي
يا الهجيني غيرها لا تغني له
من حنين القلب ما ابيك تاويلي
غن صوت العشق واشعل قناديله
لين ترقص لك لحونه وتبكي لي
ما عليك من المسولف وتحليله
بالعرب صاحين مثل المهابيلي
الغلا في بعض الايام له ميله
ما صفا لابن الملوح ويصفيلي
في عيونه كم تحاشرهما ليله
وكم رماه الوقت بين المحابيلي
الهواوي بيدنه غرابيله
داخليه علته سقمها ليلى
لا مريض.. ولا معافى.. ولا حيله
وان شكا شاف العنا والبهاذيلي
في رجا ليله يساهر مية ليله
راح عمره في مراجا المقابيلي
آه من دنيا الهو شر منهي له
لا اسعدت روحي.. ولا خلّت اللي لي
"مدارات شعبية"