التناقض هو سمة هالعصر وحلوله قليله
من يحاول يتعب أفكاره ويبحث عن دواها
والجروح اللي نتايجها شقى روحٍ عليله
ما يعادل غيضها في كل ما يحوي رضاها
خلها بالصدر وأيام البشر ما هي طويله
ما بقى فرصه لها واللي خذاها ما خذاها
والخيال اللي من أول عام وعيونك تخيله
مستواه أبعد من أحلامك وشرهة مستواها
واقعك هو واقعك والصدق بلسانك دليله
والشهود كثار والروح الشقيه من شقاها
والسراب اللي خذاك وعذبك في كل ليله
كنه اللي راح له مع رحلةٍ يجهل مداها
ما يساوي واقعك مع واقعه جمله حصيله
العذاب اللي خذاك وشال روحك عن حماها
والخطأ ما هو خطاك ولا خطأ ذيك الوسيله
هكذا الأيام والخطه عرفها من قراها
كنّها كبوة جواد وكنّها هفوة كحيله
وكنّها ضحكة يتيمه قبل تولد في شقاها
فيه شيٍ مستيحل وفيه حاجه مستحيله
والكلام أحيان سلعة ليل والجاهل شراها
الأكيد إن الحكايه كلها قصه طويله
مرحله في مرحله والناس من يدرك رضاها
"مدارات شعبية"