يا الله يا عالم خفا كل مكنون
يا واحداً تسجد له الناس لرضاه
يا عالم باللي بدى داخل الكون
واللي بعد للناس ما بان مبداه
ياللي على أمرك تامر الكاف والنون
يافزعة اللي ما قوى حمل بلواه
أرجيك ياللي في الشدايد لنا عون
ويرجيك قلبٍ بيّح الوقت نجواه
أجبر مصابي يا فرج كل محزون
قلبي حزين ونار الأقدار تصلاه
في تسعه تسعه عام خمسة وعشرون
يومٍ علينا يا عظم شان ما خفاه
حل الخبر سيف على الكبد مسنون
يقول جدك حكم ربّه توفّاه
أمسى عليّ الليل والبال مشطون
حملي ثقيل وعجزت الروح تقواه
وحالي صويب وفي الحشا تسعة طعون
والدمع من عيني على الخد مجراه
أبكي وغيري عقب فرقاه يبكون
وتبكيه نجد وشامخ النير ينعاه
أبكيه يا عيني ترى القلب مطعون
أبكي على اللي ما أنجبت نجد شرواه
شيخٍ خذاه الموت ما منه يشكون
ربعه وجيرانه ومن جاه ينخاه
شيخٍ تبسم يوم لفوه مكفون
النور من وجهه سطع في محياه
شيخٍ في طيبه ما اختلف راي وأظنون
طيّب وطيبه مانسوي سواياه
حام الدخيل اللي من عداه مغبون
شيخٍ شهد له بالكرم كف يمناه
مرحوم ياللي داخل القبر مدفون
في ذمة اللي كلنا في رجاياه
في جنة الفردوس مع من يحلون
في جنة الفردوس يارب مآواه
وأدعيك ياربي عدد من يصلون
على السراط المهتدي ثبّت خطاه
وجعل السحاب اللي نشا غيم ومزون
يسقي نثيل القبر يا رب من ماه
وينبت زهر من كل نوعٍ ومن لون
والقبر روضة والزهر دوم يكساه
ويا مسلمين اليا خشعتوا تصلون
أدعوا له الرحمة عسى الخلد مثواه
وأختامها صلوا عدد ما يطوفون
حجاج بيت الله ومن سار مسعاه
على النبي الهاشمي خير مأمون
رسول ربي من هدانا على هداه
"مدارات شعبية"