سلطان دورات الليالي خذنه
ولاهوب الاول فاقدٍ قبله احباب
ياليت عجلات المنايا أمهلنه
لعيون من يرجيه وعيون الاقراب
معذور لو أنهت من الصدر ونه
وابكي عليه اللي توفى وهو شاب
ما غير عشر وعشر ماتمهنه
توه شباب وفيه من عقل شياب
زين الطبايع ماشيٍ دربهنه
والا الردا ماصار له معه هنداب
يالله طلبتك جعل مثواه جنه
يامنزلٍ يونس وطه والاحزاب
يا واحد نرجي ثوابه ومنه
محيي مميت وتبعث الناس لحساب
واصبر يابو سلطان والموت سنه
وارج العوض من خالقك رب الارباب
وامه لعل عيونها اللي بكنه
يلطف بها اللي من ترجاه ماخاب
ايامنا عند الولي عدهنه
وحنا بها الدنيا طراقي وعزاب
لو شفت يومك طاب لك قلت اظنه
بكره يطيب يشين الاخر ولاطاب
ودنيا الفنا لو شفتها مستكنه
تضحك وترمي لك محابيل الانشاب
والله هو الخلاق لانسه وجنه
لعبادته ولهم نهايات وكتاب
رب كريم نطلب العفو منه
سبحان من يجبر عزا كل منصاب
"مدارات شعبية"