أبدا بسم ربنا وهو السميع البصير
وأقول مني على كل الحضور السلام
يا مرحباً يا هلا بك يا سمو الأمير
ترحيبة عدّ ما هلت مزون الغمام
يا مرحباً عدّ ما غرد على الغصن طير
اعداد ما غرد البلبل وطير الحمام
باسم ضرماء وأهلها كبيرهم والصغير
يا مرحباً يا ولد عبد العزيز الإمام
يا مشعل الخير في جيتك عز وخير
طلعتك مثل البدر يزيح كل الظلام
انت لفعل المكارم والشهامة جدير
يدفعك يم الوفاء للشعب شوق وغرام
أبوك صقر الجزيرة وانت أخونا الكبير
بقلوبنا لك محبة مع غلا واحترام
صقر الجزيرة موحدها بسيف شطير
وقبله وحال الجزيرة في شقا وانقسام
أسس لنا دولة فيها المفكر يحير
من لا راء قال هذا من ضروب الحلام
وصار الوطن فيه دكتور وشيخ وخبير
والحكم من منهج السنة مشى واستقام
الله ينجي عظامه من لهيب السعير
رمز العرب فخرهم وأبو الملوك العظام
يا أخو فهد يا مجير اللي لجا يستجير
مواقفك شاهدة لك يا رفيع المقام
وفهد العرب ذخرنا ما له وصيف ونظير
عز العرب والاعادي ما تذوق المنام
وولي عهد الفهد نعم العضيد النصير
رجل المواقف بحزات الوغا والزحام
وسلطان بالجيش ضد اللي حسود شرير
ما يلحق الشعب بأفعاله شكوك وملام
انتم هل المجد يا عز العرب والقصير
قصيركم ما يهان ولا يحس ويضام
بجهودكم سهل الله كل درب عسير
والمملكة ساد فيها العدل هو والنظام
المملكة كلها تنعم بخير وفير
بيت العرب عزهم دار الامن والسلام
بفضل من الله دفعتوا كل شر خطير
من زعزع امن الوطن راحت حياته عدام
ما ينكر افعالكم غير الجحود الحقير
انتم هل المجد والذروة وراس السنام
وانتم هل الجود والنخوة وعون الفقير
حقائق واضحة وانا اختصرت الكلام
يا الله تحفظ وطنا يا العلي القدير
يا خالق الكون كله يا منشي الغمام
وصلوا على اللي بعثه الله بشير ونذير
نبينا المصطفى هو خير كل الأنام
"مدارات شعبية"