عيدك مبارك عيدنا شوفتك وانت!
شوفت جنابك تجعل العيد يزدان
لا هنت يا فارس هل الجود لا هنت
العيد كن بفرحتي فيه نقصان
لو لا جنابك ما تطمّنت وأمنت
ولا صرت أنا فعلاً مع الناس فرحان
يوم الزمان الشين لي شان ما شنت
تبسمت لي في محياك الأزمان
ويوم اكتئبت من المقادير واعلنت
عجزي وصرت بقاسي الوقت بلشان
وشد الزمن وكتض وجهه تزبنت
وقمت اعتزي وأقول سلطان.. سلطان
جيت أنت ياللي بالطليعة تبيّنت
وأعلنتها فزعة على رأس ما بان
كلّ تخلى باللوازم وجيت أنت
فزعت وفا واخلاص وعزوم وإيمان
اللي عن دروب العلا ما تهاونت
وكل عرفك إنك عن الضيم مزبان
كبير فعل ورأي للطيب ثمّنت
وقدرك كبير وللمراجل كحيلان
طرق المراجل جيتها ما تماهنت
بالمرجلة تحرج خصيمك ولك شان
فزعت وفا جودك ولافعالك إندنت
وأنا لك أول يا ابيض الوجه مندان
ياللي على العليا رقيت وتبيّنت
الله يجزاك بجزيلات الإحسان
ويثيبك اللي له تدريت وأمنت
وتثقل موازينك بروغات الأذهان
ويجزاك بالإحسان يوم إنك أحسنت
وعند الولي جعلك تبشر برضوان
"مدارات شعبية"