أربع ليالي لوَّع القلب راعيه
كل ما نهيته جاوب القلب لله
أربع ليالي وأربع أيام موذيه
كنه جريحٍ والمصايب تمله
قلبي وأعرفه لاطرت له طواريه
ينطح شماله والمحاني تتلّه
أواه يا قلبٍ سرى من محانيه
لا هو مريض.. ولابه اليوم علّه
قلبي تولع يرجي اليوم غاليه
ياكيف خلٍ يذبح اليوم خلّه
ياما جهم له واتعبتني مساريه
والدمع مني كل رجمٍ يبلّه
ربي عطاه وكامل الزين معطيه
كلّه جميل ومجمل الزين كلّه
لامن نظرلي والحياء ملتهي فيه
كني لمحتك يالقمر مصغي لّه
ذاك بجماله مودع القلب يتليه
ياللي تلومه (درب عمّك تدلّه)
رحله وقله وأقنعه كان يمديه
ينقذ حياتي يا ملا الخير قلّه
أربع ليالي قبل أشوفه وأحاكيه
بس أتلوّى.. وأطلب الله يحلّه
الله يصبّر من يحبه ويغليه
وأنا أشهد إنك يا لليالي مملّه
"مدارات شعبية"