الطيب ما هو ملك لا حدٍ مقره
الطيب تظهره الفعول الجزالي
ليا جا نهارٍ زاد فرّه وكرّه
القرم يبرز يوم ياتي مجالي
اللي على وضحا النقاء ما تضره
ينوي بها والله عليه التوالي
أما يعيش بعز وسط المجره
وإلا مرد الكون هذا الزوالي
أبعد عن النمام خيره وشره
ليا شافله غرات جالك يلالي
يضحك معك والقلب فيه المضره
يفرح ليا صابك من الدهر والي
ينقل خبرك بزايد الفين مره
ما عنده أحساس ولا هو يبالي
يسعد ليا شافك مصاب ويسره
الى أبتليت وصار لك سوء حالي
أحذر من اللي لك بقربه مغره
ما ينفعك لن جات سود الليالي
ميت ضمير وكل شارع يفره
والى نصحته قال مالك ومالي
مؤذي ولاهله كل شر يجره
ياالله دخيلك من غثيث العيالي
أحد شكاه وغير صابر بحره
من شيمة أهله قدروه الرجالي
الصبر للي مبتلا كره دره
يصبر وعند الله مرد السوالي
الصبر للرجال عز ومبره
ميزة رجال يكسبوا المعالي
من كان يبغى الطيب لا حد يبره
الطيب يبدأ بالرفيق الموالي
"مدارات شعبية"