قالوا تغزل للتغزل جماهير
كلٍ يبيه وكل شخص يوده
قلت التغزل يالوجيه المسافير
للي مع ادروب الهوى باح سده
ممشاه في منهج وانا منهجي غير
وكلٍ على جسمه لبس ثوب قده
ماهمني وصف البنات الغنادير
وتوصيفهن ما احدٍ وصل حول حده
بحر المحبه ما ذكر له مقادير
ولا اشغلت بالي بين جزره ومده
اتعب على المعنى القوي ياهل الخير
ومن واقعك يالمجتمع نستمده
اخذ مع الموضوع سجه وتفكير
وما فيه علم الا يجي علم ضده
شي يبي تنبيه من دون تحذير
وشي يبي تحذير صارم وشده
ذوقت العنا كله عجاج ومعاصير
ولا يدرك ابعاده كبير المخده
ما سج رجله مع اطوال المشاوير
وجنب طريقٍ ما لنا عنه صده
ويا طيب من حبله وصل جمة البير
يشرب ومن يارد حشى ما يرده
يجهد ولا حسب حساب المخاسير
وافي وطيبه للمراجل يحده
نطق الحقايق مايجي فيه تزوير
وبيت الشرف لاقام ما احدٍ يهده
بعض العرب يرغب قصيدٍ بتصوير
وبدع القصيد الاجتماعي يشده
ولا قلت من يهوى الغزل فيه تقصير
شعر الغزل محسوب كلٍ يعده
واختام قولي من يجيد التعابير
لله دره بين روحه ورده
"مدارات شعبية"