فكرت في وقتٍ تحير أبه الأفكار
وقت يبي فزعت سيوفٍ شطيره
اللي ليامن صار للحق ما صار
ترخص عمارٍ دون مسه كثيره
قوموا سوى يالله معي ياهل الدار
تكاتفوا ما عاد بالهرج خيره
جتنا فئاتٍ يدعون من الأخيار
أهل الضلاله دهور الله مصيره
ناس نفى الإسلام منهجهم الضار
الدين ينفي والشريعه وغيره
هم يحسبون الدين تفجير وحصار
وترويع أمن الناس في كل ديره
قتل الأوادم كلها صغار وكبار
ما ميزوا بين الكبير وصغيره
تلبس وجيه الدين وقلوبه احجار
تلبس وجيهٍ طاهراتٍ سفيره
وده تلوث صورة الدين بغيار
جتنا فتاويهم بعبر الاثيره
حطوه قناةٍ سموه صلح واعمار
ما هي قناة اصلاح هذي دميره
يا شعب لا تسمع سواليف هذار
لا تستمع لأهل العقول الغريره
يا شعب لا تهزك عواصيف وأعصار
ومهما يصير أصبر بعزم وبصيره
اصمد وخلك للحواسيد قهار
نبي وطنا ما نبي شي غيره
أنتم جنود للوطن سر وجهار
عزه ونصره بالامور الخطيره
يا شعب عشتوا في بساتين وانهار
ميه سنه عشنا حياةٍ بريره
واليوم جا رد الجمايل يا الأحرار
صفوا سوى بوجيه ناس شريره
أهل الحسد يا علهم بألف صنقار
قولوا معي يا الله تعرقل مسيره
لعموم شعب المملكة أجهر أجهار
وخصوص الأمن أهل العيون السهيره
الله يلهم جهدكم صبر وإصرار
وينصركم الله يا صقور الجزيره
لابد من يوم تزين أبه الأخبار
ولابد من بشر ونسوق البشيره
في ظل حكام لهم بالوفى أذكار
حكام نجد يا عسى الله يجيره
يا عل عودٍ وحده ما يجي النار
عساه بالفردوس يشرب غديره
ويبقون حكامي طويلين الأعمار
من جاء بذراهم ما يجفل بعيره
وتقبلوا مني تحيات وازهار
اعداد ما هلت مزونٍ غزيره
والمعذره كاني مقصر بالأشعار
أبي السموحه خان بي تعبيره
"مدارات شعبية"