لولاي أسلي خاطري بالقصايد
وأرسل مشاعر خاطري للجريدة
ما طاب جرحٍ بين الأضلاع كايد
جرحٍ بقلبي له سنين عديدة
لا صار شوق القلب والهم زايد
ما ارتاح لين أكتب قصيدة جديدة
بالله يا للي تطبعون الجرايد
هذي حكاية قصتي والقصيدة
تسهر عيوني والسهر لي عوايد
لين السهر والهم جسمي يبيده
والهم ولّع وسط قلبي وقايد
توليع نارٍ ولعت في حصيده
عفت الفراش وعفت نوم الوسايد
والزاد حتى النفس عيت تريده
أشكو إلى الله ثم إلى القوم عايد
جور الليالي والظروف العنيده
راع الفعول المبطية والجدايد
قرمٍ من قروم العيال ووليده
هذاك أبو راشد بوقت الشدايد
كل العلوم الطيبة ما تكيده
عبر الجزيرة ودى أرسل وأعايد
أرسل لعايد وأتحرى بريده
"مدارات شعبية"