الباقي الله والفنا حظ الإنسان
ولا يدوم إلا الولي جل شانه
يا عم وان بار الزمن واظلم وشان
هذا مقامك باقي في مكانه
شيخ تعرف الله في كل الاحيان
حفظت حق الله وصنت الامانه
ما غيّرك طبع الليالي والازمان
ومنتب من اللي طاع ميلة زمانه
ترى عزانا نور وجهك والاحسان
اللي بذلت وترجي الله الاعانه
وذاك الوقار اللي كسا وجهك ايمان
وبيّض به الله حر وجهك وزانه
وصوت الحقيقة لانطقته بالاذان
وقلت الله اكبر لا صدحت بأذانه
في مسجدك ما بين ذكر وقرآن
هذا مكانك هد موتك كيانه
رفعت رجلك عن ثرى كل حقران
ولا مشيت بدرب ذل ومهانه
كل يذوق الموت لو كان من كان
ولا يموت احد ترى قبل اوانه
الله يصبرنا على غم واحزان
ويصبر اللي عض سنه بنانه
لو غبت هذي صورتك وسط الاعيان
يشع منها النور تقوى ورزانه
لو غبت ماجفت من الدمع الاوجان
ولا سلى فكر الفجيع وجناته
ودعتك الرحمن ياذرب الايمان
جعلك بحفظ الله وستره وامانه
يالله عسى قبرك بساتين وجنان
ويفتح لك الله فيه باب لجنانه
والباقي الله والفنا حظ الانسان
ولا يدوم الا الولي جل شانه
"مدارات شعبية"