سر يا قلم واكتب على بيض الاوراق
سطّر على بيض الورق بالدواتي
سطّر بيوتٍ تصلح لكل الاذواق
تقطف كما تقطف زهور النباتي
انا لها طربان بالحيل مشتاق
ابيات تحكي موجز عن حياتي
تحكي عن اشي احرقت قلبي احراق
فضلت عن توضيحها بالسكاتي
اخاف تاتي سلعةٍ وسط الاسواق
وتاتي فوايدها علينا شماتي
والهاجس اللي للطواريق عشاق
مشتاق للطاروق والمفرداتي
اجامل العالم ولو خاطري ضاق
واكيد به ناس تسوي سواتي
فعل القدر غصبٍ ولو ما بينطاق
والايام هذي تظهر الخافياتي
فالرابح اللي جامع عرف واخلاق
ولابد ما تقفى الحياة المماتي
العمر يفنى وابن ادم على ساق
يطرد ورا أيامه وهي مقفياتي
"مدارات شعبية"