صاحبي وان ضاق صدرك تراها ما تضيق
خل نظراتك لقدام قدر المستطاع
واختر الاصحاب لاهنت من قبل الطريق
ومن مشى من دون الاشوار يا مشكاي ضاع
خذ كلام اللي حمل حمل فوق اللي يطيق
يوم عيا لا يطيعه زمانه غصب طاع
كانت احلامي كبيرة وانا عودي دقيق
كانت الأفكار بالبال له حرب وصراع
كنت ادور بالممرات لي قلب شفيق
بين شد وجذب والروح مع وقته نزاع
كانت الامال بالعين له ضو وبريق
كانت الهقوات هقوات زيزوم وشجاع
لين وداني زماني على الدرب العتيق
يومها وقت جفاني بلا ذنب وباع
بين ميلات الليالي وطعنات الرفيق
شلت حلمي بين الاضلاع واعلنت الوداع
تجربة والنيم بالليل لو طول يفيق
دام يقفي ظلمة الليل يالصاحب شعاع
صاحبي وان ضاق صدرك تراها ما تضيق
خل نظراتك لقدام قدر المستطاع
"مدارات شعبية"