رحماك يارب العباد المصلين
رحماك فا اللي انتهت فيه دنياه
عبدٍ نشا في طاعتك نشأة الدين
ما همّه الا يقبله بس مولاه
للجود بمحيّاه رمز وعناوين
والطيب دايم تفعل الطيب يمناه
له سيرةٍ منها تعطّر دواوين
له سيرةٍ تصعب على غير شرواه
هذاك أبوي اللي رحل واغرق العين
دمع نزف من حل بي يوم فرقاه
يوم عليّ اكبر من سنين وسنين
بحزن جثم في صدر من كان ينعاه
بعده غدا ذا الليل عندي بليلين
في مجلسه جالس واناظر لمركاه
الحزن خيّم والزمن جار بي لين
ما عدت أميّز بين ذولا وذولاه
اشوفهم لكن ما اشوفهم زين
من دونهم يشدي سراب بمضماه
ويا رب انا سألك يوم الموازين
رجّح له الميزان يا لله يا لله
رحمتك يا رب العباد المصلين
تضفي عليه وتجعل الخلد مثواه
"مدارات شعبية"