يا بوي ما والله يرتاح لي بال
وانا عيوني ينظرنك مريضي
يا تاج راسي يوم اشوفك بها الحال
دمع الحزن من نون عيني يفيضي
يوم اتذكر صحتك ما لها امثال
اون لي ونه تجدد نقيضي
وينتابني ضيقه وحزنٍ ولوال
ويضيق بي نجد الفسيح العريضي
واعايش همومٍ لها انواع واشكال
وما بين حين وحين يزداد غيضي
يابوي لك في داخل القلب منزال
حبٍ تملك خافقي ما يغيضي
ويابوي ياللي للثقيلات شيال
انته سندنا فالزمان العضيضي
يانورنا الوهاج ياغيث يا ظلال
فالبرد والا في لواهيب قيضي
ويابوي ما مثلك ملا العين رجال
في شخصكم يا والدي ما استعيضي
ويابوي يازين السجايا والافعال
ايديك من نيل المعاريف بيضي
بالطيب وافي موفيا كل مكيال
ومحبوب عند الناس مانت بغيضي
ليت الشفاء يشرى ونشريه بالمال
والله لجيبه بالعجل ما يريضي
لا شك عند الله تصريف الاحوال
منشي السحاب وبارقٍ له وميضي
ابرتجي منزل تبارك والانفال
رجاي باللي للخلايق حفيظي
الله مدير الكون غيره فلا اسال
يشفيك من يشفي العليل المريضي
واشوفك معافى يودع الضيق ينجال
واعيش مسعد بالحياه وحضيضي
"مدارات شعبية"