الشاعر خلف بن غالب المريخان الحربي شاعر جيد له العديد من القصائد. لنا وقفة مع بعض قصائد شاعرنا:
من قصيدة تحدث فيها شاعرنا عن جلالة الملك عبدالعزيز بن عبدالرحمن آل سعود- طيب الله ثراه- يقول:
عبدالعزيز اللي وطى روس الاضداد
قاد المسيره لين سيره وصل به
وصل مقاصيده على روس الاشهاد
بالراي والحكمه وسيفٍ جزل به
ومن قصيدة توجيهيه نختار منها قوله:
احفظ لسانك بالخطأ لا يوقعك
لايوهقونك ناقلين النمايم
ترى النمايم يافتى الجود تدفعك
مع سيرة الانجاس واهل الظلايم
ومن قصيدة اخرى يبين فيها شاعرنا مكانته بين الشعراء حيث يقول:
انا مقر ولاني حاسبٍ نفسي من الشعار
حرام احط نفسي في مكان ما يناسبها
كما ان الشعر بحرٍ يخلف الهقوات والانظار
ولا حدٍ يعرف اسراره ياكود اللي يغوص ابها
ومن قصيدة غزلية يقول:
ياعنق ريمٍ رباله بارض ممطوره
قام يتيه ويقطف كل زملوقي
سبحان ربٍ خلقك بهاذي الصوره
وعطاك زينٍ ماهو في كل مخلوقي
ياعود موزٍ نما في وسط مزهوره
دوم الهبايب تهزه فوق دانوقي
اما من قصائد الرثاء فنختار هذه الابيات من قصيدة يرثي فيها الشاعر الكبير هواش عايد السليمي الحربي:
من حل لابده عن الدار رحال
محدٍ حياته دايمه عامرت له
مار اتحسر لاخذ الموت رجال
لو هو من الاجناب عيني بكت له
اللي بهم ستره عن الشمس وظلال
ما ترتهب كان القسا واجهت له
وهواش تبكيه المعاني والامثال
اللي صخرها غصب ما صخرت له
مع الرجال اللي لهم قدر واجلال
اللي على فعل الوفاء وافقت له
نتمنى لشاعرنا التوفيق.. والى اللقاء مع وقفة مع شاعر اخر.. ولكم تحياتي.
"مدارات شعبية"