أخير ما يرفع الرجال ويزينه
ثلاث هي زينة الدنيا وما فيها
يرفع بها قيمته ويزيد تمكينه
الخير معقود باولها وتاليها
الاوله: في حياته لاحفظ دينه
على الشريعة وطرق العز ماشيها
الدين عز الحياة وقيمة اسنينه
في طاعة الله وتعبٍ في مساعيها
دنيا الفتى لو ملك فيها ملايينه
من دون دينٍ لاخير ابها ولا فيها
والثانية: فعلها يكثر محبينه
لا جاد بالمرجله واكمل معانيها
الله يحب الكرم ويعين مسخينه
أرزاقهم دايماً ربي مهييها
من حبه الله بسط الأرزاق بيدينه
تجود يمناه والله ما يخليها
الناس تتبع بلاشكٍ رضا عينه
والجود لجواد بالمعروف قانيها
والثالثه: صيرميٍ تورد يمينه
لا ما اقبلت كالسهم تنزي بحاديها
مقدام ما يردعه قوة معادينه
هذي الشجاعة وذا بالفعل راعيها
عند المواجه يوطي القاس ويهينه
ما يكسب النصر من يحسب قوافيها
هذي ثلاثٍ تعز الرجل وتعينه
تبني له المجد وعيوبه تغطيها
من راد ترجح بها شوكة موازينه
فدروب الخيار مع الخيار يمشيها
فالخير بانت على الدنيا براهينه
يحمد مصابيحها في الليل ساريها
"مدارات شعبية"