Al-jazirah

شاعر الأسبوع....... شاعر الأسبوع.......
مفرح بن قاعد الضمني المطيري

* زهران عون الله المطيري :
الشاعر المعروف مفرح بن قاعد الضمني المطيري شاعر مقتدر له شهرة واسعة.. من أبرز معدي برنامج ركن البادية في دولة الكويت.. كتب في مختلف اغراض الشعر ويعتبر احد فرسان شعر المحاورة.. وكذلك من رواد الاغنية الشعبية حيث اشتهر بقصائده الغزليه الجميلة عبر الاسطوانات في الثمانينيات الهجرية.. يميل إلى شعر المديح والحكمة ويغلب على اشعاره الطابع الغزلي.. اليكم مقتطفات من اشعار شاعرنا:
*****
يقول من قصيدة يمتدح بها جلالة الملك عبد العزيز بن عبد الرحمن آل سعود:

عبد العزيز مودب الحي بالميت

كونه على وضح النقاء المجرهدي

خيله على الجمع المعادي مشاويت

يشبع بمركاضه طيورٍ تهدي

أسس ركون المملكة واحصن البيت

باب الشريعة فاتحه ما يسدي

ومن قصيدة تتصف بالحكمة يقول:

أنا رفيقي ما سمع اللي حكابه

لو جاتنا منه السوالف مضاريع

اقرا مفاهيمه واحسب حسابه

واشوف مدخال القدم والمطاليع

ماني عجولٍِ بالزعل في غيابه

قدام ما سمع منه ما عطي ولا ابيع

لا خير في رفقه بليا حبابه

ولا خير في جمعا القلوب المواجيع

ورفيقك الغالي تحمل عتابه

واحلم عليه اليا دفعته دوافيع

شيع ثناه ولا تبين عيابه

عاره يعورك يابعيد المراميع

وفي احد المواقف يقول شاعرنا:

والله ما دري كيف الايام صارت

هي ضدنا ولا نباري ضعنها

ساقتني الحاجة والايام دارت

وكم واحدٍِ مثلي حياته رهنها

وجلبت نفسي للجماعه وبارت

ويقطعك يانفسٍ رخيصٍِ ثمنها

ياسبق خلان الرخا يوم نارت

مثل الهبوب اللي سريعٍ دخنها

ومن نصائح شاعرنا يقول من قصيدة:

عندي نصيحة للرجال العوارف

قصيرتن والا الكلام طويل

موضوعها سلم العطا يوم يعطا

والمعطي اللي للعباد كفيل

يعطي العطا رجلٍ يبي اجره من الله

ليا زار بيته عابر السبيل

ويعطي العطا رجل يبي المدح والثناء

ليا جاء حديثٍ بين قال وقيل

ليا قيل نعم فلان وفلان لا لا

النعم للي يفعل الجميل

ويمن العطا اللي تجهله مدة العطا

يضحك اليا قالوا تراك بخيل

ما يدري ان البخل دربٍِ فاضح

راعيه عن درب الرجال يعيل

اما عن وصف الرجال فيقول شاعرنا من قصيدة:

رجل على الناموس بيضٍ خدوده

ورجلٍ على وجهه سوات السوادي

ورجل يضيع به الثراء من نقوده

ورجلٍ اليا زرته من الجود جادي

ورجلٍ حباله للرفيق معقوده

يصير لك مثل الجمل والقرادي

ورجلٍِ يشيل الحمل هونه وكوده

بالسلم والا بالسيوف الحدادي

ورجلٍ بطيبه ما تعدّى حدوده

ورجلٍ بحلمه ما يجي له ملادي

ومن قصيدة قالها شاعرنا في والده عندما كان مسافرا عنه بعيدا:

يا مل قلبٍ صايرٍ فيه دكاك

راحت مع الغربي تكافخ طيوره

يالطرقي اللي عندنا صار ملفاك

عينت لي دارٍ عساها معموره

قال افتهم والعلم ما عاد يخفاك

ما ينكمي سرٍ طلع من صدوره

لك شايبٍ يفرح بشوفك وطرياك

يطلب جميلك عقب زلت عصوره

عودٍ كبير وحده البعد ما جاك

من بعدكم قامت تعمّس أموره

يابوي انا لو رحت بالبعد مانساك

ما انساك لو طالت علي الشهوره

ومن قصائده الغزلية هذه الابيات من قصيدة:

يا هل الهوى والمحبة ضاع مني غزال

سودٍ عيونه على العشاق يغضي بها

له بكلةٍ فوقها تاج الذهب والهلال

وخدود حمرٍ من المنديل محفي بها

في ملعب العيد ضاعت شرق مدري شمال

ياليت عيد السعد يلفي ويلفي بها

ومن قصيدة غزلية اخرى يقول:

يازين زولٍ نطحني يشغل البالي

فنان ويديه بالحنا مخضبها

يلبس عباة الطرب والخصر ميالي

وقذيلته نسمة الغربي تلاعبها

سلم عليه وخلاني على فالي

اقفى وانا اقفيت وعيوني معذبها

يا عود ريحانةٍ بستانها سالي

تمطر عليها الثريا من سحايبها

ومن قصيدة غزلية اخرى يقول شاعرنا:

يا غزالٍ نطحني مع طريق الحويه

ناثرٍ فوق جسمه من حسين الروايح

خشف ريمٍ ربا باحضان نجد العذيه

بين خضر المرابع والغصون السبايح

طلع القذله الشقرا وسلّم عليه

قال لي ياصباح الخير وانت رايح

قلت انا التايه اللي ما عرف وش نويه

مثل طلاب رزقٍ من يدين شحايح

ومن قصيدة اخرى يقول:

يا بدر خلي بالهوى شاتني شوت

شوتت لواعيبٍ تشاوت كورها

معاد ينفع به قصيدي مع الصوت

رايات حبي في يدينه كسرها

غديت مثل اللي مع الدرب مبهوت

ايام قيض وحملته ما قدرها

والا وريعٍ غابت امه مع الموت

عينه من الفرقا تنكث عبرها

عليك ياغروٍ حذفني بتابوت

حبه معاليق الضماير سعرها

غروٍ كلامه قوت ومقابله قوت

يطرد عن النفس المريضه كدرها

صدر لشاعرنا ديوانه الأول.. والذي يحتوي على قصائد قيمة وجيدة.. نتمنى لشاعرنا التوفيق والى اللقاء مع شاعر آخر.. ولكم تحياتي.

بريدة