يا الله يا اللي عندك الفضل والجود
يا اللي لك أرقاب الخلائق خضوعي
تعيننا بالصبر يا خير معبود
بحسناك تلهمنا عند الفجوعي
والله يصبرنا بفرقاك يا سعود
فرقاك معها لا عنا الحزن لوعي
أجل وفا مكتوب في اللوح محدود
لا جاء القضا ما ينفعون الفزوعي
ما عندنا إلا الصبر والصبر محمود
أوصابه اللي للخلائق شفوعي
واللي أصباك يا فهد صابني زود
ذاراف أدموعك جاوبتها أدموعي
ولو البكا من قبلنا رد مفقود
بكيت عنده لو تهشم أضلوعي
خويي اللي طيلة البيض والسود
اللي قضيناهن ذهاب ورجوعي
عشرين عام وخمس بحساب معدود
الدرب واحد والمراجل طلوعي
ياما قطعنا ديرة ما بها رود
أرض خلى محد نزلها اقطوعي
ونمسي مزاهبنا ملي من الفود
وأناسة ما دنسوها الخموعي
ولا قط يوما بيننا صار منقود
على النقا والزين حسن الطبوعي
عزيز نفس وفي سجاياه محسود
ولا هوب في هزل المذاهب دنوعي
أمسيت من فقده على القلب ملهود
عفت الحرارة مبعدات الطلوعي
نوادر فيهن صائد ومصيود
اللي إلى جاء وقتهن طار شوعي
وش خانتك دنيا حلاوتك بنكود
ياما سقت بالمر من كل نوعي
عسى مقرك جنة الخلد يا سعود
من قلبي أدعي لك وغيري أجموعي
وصفحتك بيضا يوم شاهد ومشهود
والكل للرحمن صاروا أخشوعي
"مدارات شعبية"