لا حوله أصحابٍ ولا عنده إخوان
حظه تردّى في حياته وخانه
صارت ظروف الوقت ضده على شان
يموت من زود القهر والمهانه
ويكفي أعز إنسان لاهي من أزمان
من وقت فاقد في حياتي حنانه
أستغرب الفزعه من فلان وفلان
وأقرب قريبٍ راح كلٍ وشانه
وينه هذاك اللي أناديه ذيبان؟؟
كلمة (علامك؟؟) ما نطقها لسانه
أخوان أي أخوان يا وقت الأحزان
خلاص ذاك الوقت روّح زمانه
ما عاد به طيبٍ ولا فيه عرفان
كلٍ يعدد في حياته ضمانه
احتجت بالشدة يصوّت لي إنسان
والكل من حولي رسب بامتحانه
ولاني بشارِه كان بالأمس شرهان
ما عاد للشرهه معي أي خانه
يا وقت يكفي جرح منك وخذلان
كنّك معي طيّحت كل الميانه
إنسان.. يشكي جرح أهلٍ وخلان
ويكفي نجوم الليل صاحت عشانه
لا لا يغرك والحقايق تبي تبان
وبنشوف وين ووين رفع المكانه؟؟
ما قلت ظلم وزيف ما قلت بهتان
حروف شعري اعتبرها أمانه
(نصف الحكايه) قلتها بأصدق لسان
وأدري بعضهم يعتبرها إهانه!!!
"مدارات شعبية"