رقمٍ على شاشة الجوال بكّاني
كذبت عيني.. وقلبي صدّق أرقامه
رقمٍ عرفته مثل عرفي لجيراني
ياما بسمعي تجلاّ حالي أنغامه
شفته.. وشفت العزيز الحاضر الفاني
ما بين الأرقام أشوفه وأسمع أنسامه
يا وارث الرقم يا ذخرى.. على شاني
ما ود عمك يشوف الرقم قدامه
رقم يجدد عناي ويبعث احزاني
ويذكر النفس عاليها مع أيامه
الحزن خيم بكبدي ما تعداني
من يوم لفوا عديل الروح باحرامه
ياالحربي الحزن لوما أبيه يلقاني
يلبسني الحزن لبس الشيخ لحزامه
أما غزتني جيوشه لين تاطاني
والا رماني على الغفلات بسهامه
مالي رجا إلا رفيع العرش والشاني
يفرج هموم الحزين ويجبر عظامه
ربي ولا غير ربي واحدٍ ثاني
يحمد ويشكر على بلواه وأنعامه
"مدارات شعبية"