ابدأ بذكر الله قبل بدع الأبيات
الواحد الخلاق رب الأنامي
سبحانه المعبود رب السموات
دايم وغيره ما اتصف بالدوامي
ومن بعد هذا لي مقاصد وغايات
الله يحقق لي بلوغ المرامي
عندي نصيحه والنصايح ثمنيات
أقولها في حشمةٍ واحترامي
ابدأ بها واخصها اليوم بالذات
نصيحة خصت بشهر الصيامي
شهرٍ يبي وقفه ويحتاج همات
وياجب على المسلم يشد الحزامي
ما يقضي أيامه بلهوٍ وغفلات
ويضيع وقته مع دروب الاثامي
احدٍ يمضي كل ليله بسهرات
والا نهاره ينطوي بالمنامي
ينام ويخلي فروض الصلوات
ويحسب صيامه كاملٍ بالتمامي
واحدٍ يتابع بالريموت القنوات
ما يدري ان الدش ساس الهدامي
قلبه مولع والعواقب وخيمات
ما غير صومه عن شراب وطعامي
واحدٍ بالانترنت في كل الأوقات
يدخل مواقع من دخلها يلامي
مواقعٍ تخلف عقول سليمات
ومن غيرت فكره عليه السلامي
واحدٍ تجنب كل شبهه وشكات
ما سج رجله مع طريقٍ حرامي
في طاعة الله له عزومٍ قويات
بالنور مشيه ما مشى بالظلامي
من قدم اعمالٍ تسره إلى مات
يلقى رضى ربه وحسن الختامي
"مدارات شعبية"