يا شبيه الريم يالطرف الخجول
يا عيون الحر يا باهي الجمال
يا فريد الحسن يالريم الجفول
وصفك اشبه ما يقارب للخيال
لا تريضني وانا طبعي عجول
لا دعيتك يا بعد روحي تعال
دار حول ودار عقب الحول حول
وانت مبعد ليه يا سمح القبال
احسب حساب الطلوع من النزول
واحسب حساب الطمان من الجبال
والا انا من باقي الناس معزول
كن في قلبي من الهاجس خلال
ما تشوف الحال صاير في نحول
منحني زولي كما قوس الهلال
لا تخليني كذا جالس واقول
حسبي الله من قلب حالي لحال
عادتي لا صرت مالقالي قبول
ابتعد لو كان في بعدي زوال
جاك قولي وانت مدري وش تقول
قول رح واروح ولا قل تعال
"مدارات شعبية"