الله من قلبٍ من الوقت محزون
والله من عين تزايد عناها
على عزيز داخل السجن مسجون
رمت به القدرة وطاح بنحاها
والله يعين اللي عليه ايتباكون
وأمه تزايد حزنها من بكاها
شافت من الأيام حسات وغبون
وليا ضواها الليل جاها بلاها
هزاع والله مثلكم ما يلامون
ناشتك عبثات السنين بغثاها
أمر وقضى في ما مضى لا تهرجون
صار السبب منا ولا حدٍ رضاها
ركض له الشيطان وبليس ملعون
وقامت قيامتها ودارت رحاها
يومه وقف لو دونه الناس يقفون
الله كتب له ساعةٍ ما وراها
والناس لو عن غيب الايام يدرون
كان المصائب قد عرفنا دواها
والناس ما تملك من أمر القضا لون
وترضى بحكم الله على ما عطاها
هزاع خاف من الولي خالق الكون
اللي خلق نفسك ويعلم خفاها
انا دخيلة عود بالقبر مدفون
وأم تبرهجت اللبن من حشاها
عليك جاه الله يا مسلم تعفون
ولا ترى الدنيا قصير مداها
عليك جاه الله بحالي تروفون
مسكينةٍ تنخاك مما دهاها
مما تكنه بيحت مكل مكنون
لو تشرب الماء ما يبرد ضماها
ادخل على الله خالق الكاف والنون
اللي رفع سبعٍ وسبعٍ بناها
خله لوجه الله ترى الأجر مضمون
الصبح عند الله تحصل جزاها
تكفون يا رجال الغبيات تكفون
يا هل البيوت اللي ايذري ذراها
يا فزعة المضيوم يوم ايتنادون
يا عز من عط الصياح ونخاها
الناس دايم في الوجيه ايتذرون
من خلقت الدنيا ليا منتهاها
وأنا دخيلة وجه ما دونكم دون
ألوذ بأغلى شعرةٍ من لحاها
وان كان فيه مشببين يقومون
وأهل الوفاء نبغى الوفاء من وفاها
والله يواجرهم على ما يسوون
ومن سن له فالعمر حسنة لقاها
وصلوا على أفضل خلق ياللي تصلون
اعداد من هط الحروف وقراها
"مدارات شعبية"