مجار ياللي طول عمرك إسنافي
من شبتك حتى تكامل بك الشيب
يا مدهل اللافي ربيع الضعافي
يا سعوديا حرز الوغا منبع الطيب
يا للي بكل الطيب كامل اوافي
ما فيك هرجه يا حصان الأطاليب
جعل المنايا من قبالك تعافي
عز الله إنك من رجال المواجيب
دنيا ودين وجوهر دوم صافي
من طيب حظك ما ذكر بك عذاريب
إلا الجميل اللي على الناس ضافي
تشهد به الأجناب قبل الأصاحيب
وديوانك اللي للنشاما ملافي
وقبالك اللي به بشاشه وترحيب
كم عاجز راحت حموله إخفافي
فرجت له وأشرف إطوال المراقيب
وهو قبل معروفك يعض الأشافي
يسرحبه التفكير شرقن وتغريب
واليوم يملك منك حم الشعافي
شقح البكار اللي زهن الدباديب
ما فيك هرجة يا بعيد المطافي
لك في سنام المجد صرح ومقاضيب
عذروبك اللي فيك تضفي اللحافي
يدرق إظلالك عن سموم اللواهيب
وما قل دل وموجز الهرج كافي
دامت حياتك يا عذي المشاريب
عساك بالدنيا تعيش امتعافي
في جاه رب يعلم السر والغيب
"مدارات شعبية"