ينشدوني عن: الغيبه (وهل من جديد؟)
قلت: والناس ما تدري على أيش الغياب
يوم أسكّر ضلوع القلب عن هالقصيد
كل ما اصك باب ايفك عشرين باب
صار للناس والأسرار مثل البريد
وصرت أصدّق ظنون الشك والارتياب
ليت قلبي ضلوعه من فولاذ وحديد
ما تنوشه سهام، ولا تدكه حراب
واتريّح من اللي مستبد عنيد
كل ما أصد عنه، ايصد لي باقتراب
وكل ما جيت اقرّب منه وارجع وأعيد
حال بيني وبينه شيء مثل السراب!!
شاعرٍ لو معه حكمه ورايٍ سديد
كان ما خرّب العامر، وعمّر خراب
لا مسيّر ولا مخيّر ولاني وحيد
لا تلومون مثلي،، من يلوم السحاب؟؟
أعشق الصعب من هذا الكلام الفريد
وأتبع العذب لو ما فيه غير العذاب
أصعب الشعر جمع المختصر والمفيد
وأتعس الشعر تطويله ولو هو صواب
ما يقلل مقام السيف قل العضيد
سيف واحد ولكنه يقص الرقاب
والله إني عن المنشود ماني بعيد
فكّر اشوي تلقى في كلامي جواب
كان ما أصافح المعنى وبيت القصيد
عن غياب الجديد أهوى جديد الغياب
"مدارات شعبية"