يا ربعنا يا ربعنا ياهل الطيب
ودي أحط الحد لأهل الشتيمه
ياجب علي أبيّن الصح والعيب
وأسلك دروبٍ يا عرب مستقيمه
وياجب على الشّعار وأهل المواجيب
دايم يخلون النوايا سليمه
الذيب لا جر العوا جاوبه ذيب
وصاروا رفاقه يقطعون الخريمه
ومن لا يعدي فوق روس المراقيب
لابد ما يمشي وهمّه نديمه
وكل على نوقه يلبي مطاليب
ومن دوّر الغرات ضيع غنيمه
ما من وراسب الخلايق مكاسيب
حيثٍ سب الخلق بلوه عظيمه
يا الآدمي لا تتبع الشك والريب
ترا الشكوك توصلك للظليمه
احمد ولي الكون مدامك يطيب
لو ما بقا لك غير ناقه وخيمه
والشعر يا أهل العرف يحتاج ترتيب
وزنه وقافه والمعاني تقيمه
ويبغا رجال ما تحب الاكاذيب
في قافهم تلقا نزاهه وشيمه
واحدهم اليا قال يا ربعنا يصيب
ولا أحدٍ بلاقي له قصيده سقيمه
يغوص غبات البحر دوم ويجيب
نوادرٍ تطرب رجال كريمه
ولو تنشر الصفحه جميع المكاتيب
راح التميز والعلوم القديمه
"مدارات شعبية"