أحبها من قلب من يوم أنا صغير
حبٍ بقلبي من زمان الطفوله
في خافقي نالت محبه.. وتقدير
حتى ملا قلبي بعرضه وطوله
أحبها حيث انها ديرة الخير
مهبط كتاب الله وسنة رسوله
ارض اليمامه والحرمين.. يا بدير
أرض الكرامه.. والشيم والبطوله
افخر بها بين الدول والجماهير
هي دولة الاسلام واعز دوله
المملكة دار الملوك المشاهير
اللي لهم بالعز.. صوله وجوله
حموا حماها بالسيوف البواتير
اليا زمى العايل بقوه زموله
ما عندهم لمهدد الدار توفير
شجعان واللي يعتدي ما حسبوله
آل السعود الطيبين المناعير
مضرب مثل بالمعرفه والرجوله
هذا كلام الصدق ما قلت تزوير
والله لا قول الصدق والله لاقوله
الله يعز مطور الشعب تطوير
سير معيشتنا بيسر وسهوله
هذا فهد يوم الليال المعاسير
فالموقف المشهود بانت فعوله
فهد ذرانا عن سموم المعاصير
قايد جميع الشعب يلتف حوله
ولي عهده ما يجي منه تقصير
عبدالله اللي كل طايل يطوله
عطاه رب البيت حكمه وتفكير
بحر السياسه والجميع شهدوله
وسلطان ابو خالد زبون المخاسير
شيال حمل اللي عجز عن حموله
يقصر عن افعال البطل كل تعبير
محدٍ وصل صوب المعالي وصوله
ياكثر ما تنفق يدينه من الخير
كافل يتيمٍ ما لقى من يعوله
واختامها عداد ما غرد الطير
صلوا على من حطه الله رسوله
"مدارات شعبية"