لا هل دمعي ليه اكفه واداريه
والدمع مما حل بالقلب عينه
واسبابه فراق ابيض القلب صافيه
عبدالله.. (امحصل) رضا والدينه
عبدالله اللي كل ما حل طاريه
بين الملا قيل (ونعم) خابرينه
عبدالله اللي يدفعنه مباديه
للطيب حيث الطيب عزة وزينه
عبدالله اللي ريحة الجود بايديه
ساقت بعيد وضايقت حاسدينه
عبدالله اللي للبعيد وبنيخيه
اشد من بر الضنين بضنينه
عبدالله اللي للضعيف بمماشيه
احن من قلب الشفيق لجنينه
الله يبيحه ويتقبل حسانيه
ويورده للحوض مع واردينه
الله كريم ونطلب انه يجازيه
بالاجر والغفر مع متقينه
ويصبر اللي نار فقده تصاليه
ويجبر عزا كل القلوب الحزينه
فقد جرح ناسٍ تعرفه وتغليه
وناسٍ يحبونه مهم شايفينه
عليه سيلت المدامع؟ وقلت ايه
واحسّ في فقده بكبر الغبينه
جضيت من فرقاه ياليت ناعيه
عني جحد ما في خفايا كنينه
من قلب مفجوعٍ على فقد غاليه
في غفلةٍ منه انطلق من يمينه
ومن فوض امره بالمصايب لواليه
بالصبر والسلوان باذنه يعينه
يعطي بلا منّه ويسمع لداعيه
ويضفي على المومن جلال السكينه
وكلٍ على خافي نواياه يعطيه
وكل النفوس بما كسبته رهينه
"مدارات شعبية"