يا الله يا منجي من النار من تاب
يا واحدٍ لرضاك عبدك يلبي
ياللي هزمت بقدرتك قوم الأحزاب
تحفظ بلادي من حسودٍ يشبي
اللي يشب النار في راس مشهاب
راسه من أفكار الخباث امتعبي
ومهما يحاول بأمننا جمع الإرهاب
الوضع هادي وأمننا مستتبي
الامن بالمرصاد موجود ما غاب
يدوّر اللي بالظلام امتخبي
شخصٍ تبروا منه ربعه والأقراب
واصبح على نهج العفون امتربي
والامن مثل العين في كل مرقاب
وراه رجّالٍ لشعبه يحبي
نايف عمود الأمن حلال الأنشاب
هو الطبيب اليا عجز كل طبي
دون الوطن وأهل الوطن درع وحجاب
قدام شوف العين ما به تغبي
وأمن الوطن غالي مثل دم الأرقاب
دونه رجالٍ بالمخاطر تطبي
لا بالهم يهدى ولا نومهم طاب
مستيقظين لكل ريحٍ تهبي
وحنا دعاة الدين في كل محراب
ماهمنا اللي في قناته يسبي
كذاب واللي ينجرف معه كذاب
مال الحقيقه في حياضه مصبي
واللي يخالف ما حسبناه بحساب
طاعة ولي الأمر طاعه لريب
"مدارات شعبية"