في الليلة اللي.. صمتها يشبه البوح
هرجة عيوني.. مثل وصف الحقيقه
يا حاديٍ عيني.. على سكة النوح
ما ترحم اللي.. بالهوى جف ريقه
مرت سنين.. ودمع الأعيان مسفوح
ارفق علي.. شوي ماهي طريقه
ما فادني.. طيفٍ يجي منك ويروح
يمرني لمحه.. وعيني غريقه
قلت ابتعد.. مالي بعد فيك مصلوح
مادام مسيارك.. عليه دقيقه
وانته رسول.. اللي من الزين مملوح
اللي غيابه زود.. الصدر ضيقه
قم بلغه.. عن واقعٍ كله جروح
قم بلغه.. كيف الغرام وطريقه
قم بلغه.. صوت المعاليق مبحوح
قم بلغه.. حلم النفوس العتيقه
قم بلغه.. دمعٍ على الخد منضوح
قم بلغه.. فزعة رفيق لرفيقه
قم بلغه.. شوقٍ وصل طلعة الروح
قم بلغه.. جرح الطعون العميقه
وصّل له الصوره.. مثل ماهي تلوح
انقل على.. شاشة مساه الرقيقه
قله.. ترى شاعرك بالحيل مجروح
قصايد غيابك.. تزود بريقه
قله.. وقله.. ليش هالوصل مذبوح
حاول.. من اسبات التغلي تفيقه
يبي دليل.. بمنزله داخل الروح
شف ربعي الحساد.. شبوا حريقه
"مدارات شعبية"