يا عين صبي الدمع واركي ذريفه
لا تبخلين بدمعك اليوم لا سال
ما هو خسارة لا تواكب صفيفه
من مسترد الجفن خليه ينهال
كني الخلوج اللي استدارت معيفه
حنت وعقب اياسها اقفت بذومال
مرحومة يا الغالية يا العفيفة
اعداد ما هب الهوى وكب همال
قبل وفاتك أعرض الحلم طيفه
كنه يقول اللي تبي اليوم رحال
بنت الأصيل أصيلة يا شريفه
فيك الشرف مستلهماً قلب رجال
موقفك مع والدك يعرف وصيفه
رديتي اللي خطط الغدر واحتال
أرثيك من قلباً تزايد رجيفه
وابكيك من عينا غدى دمعها أشكال
وصيتك تبقى ولا هي كليفه
يصونها قلبي وتبقى على البال
عسى لك الجنة ظلال وقطيفه
وتصبح لك الفردوس مشرب ومنزال
والك التعازي يا مفارق وليفه
فراق الغلا معروف صعبا على الحال
قبلك بكى السراح فرقى السقيفه
ونمر على وضحى سمعنا له أقوال
ليت العوض عندي واقول الخليفه
واعيد فعل ابوي لو ما له أمثال
حسناك يالمعبود من كل خيفه
تحسن ختامك يوم للروح نشال
"الرأي"