جوي من البارح هبوبه عواصيف
ويطوفني من سجت الفكر طايف
اخذ مع الهوجاس توقات واقيف
قلبي يلوفه من رزياه لايف
لوفت غصن جال تلوفه هوا صيف
هبن عليه ميبسات الشفايف
بالقاف اخفف من عنا القلب تخفيف
والا الصوايب ما عتبرها خفايف
لا واسيوفي ياوساع المحاريف
اللي يهاب حدودها كل حايف
اقفت بهم غبر الليالي مناكيف
راحوا سلف عسا البقا بالخلايف
من غاب منهم ينفخ الصور ماشيف
مغيبة تطوى عليها الصحايف
الله خلق دنيا الفنا للصواديف
كم فرقت بصدوفها من ولايف
لا والله اللي راح من عندنا سيف
سيف من حداد السيوف الرهايف
الياجردوا حدب السيوف المهاديف
له ضربة تجلا الصدى والحسايف
راعي نقا ما هو صديقٍ على الزيف
درع حصين وكنز لهل الطرايف
نمر يشمه طالب الثار ويعيف
ما هو ذليل ولا زهوفٍ مهايف
وليا زعل على عدى بروس المشاريف
عن الغبا يشرف على كل نايف
الا ان ابو ما جد بعيد عن الحيف
عز السلوم الساميات الشرايف
كلمة نقا ما هي بطفت مزاهيف
ما قلتها راجي ولاني بخايف
"مدارات شعبية"