رحل ولد منور.. وخلا القبيله
الله يجعل جنة الخلد مأواه
حل القضا ما فيه بالأمر حيله
على الكرم والدين تمت لياله
ويجبر عزا اللي ذاق لوعة خليله
رب العباد اللي عزيزٍ جلاله
عسى السحاب اللي تراكم مخيله
دايم على مثواه يمطر خياله
وعسى الجنات المخضرات الظليله
يعطى بها مسكن ويرتاح باله
ياسرع مفزاعه لمن يحتري له
للبر والمعروف يرخص حلاله
كم جزلة يرخص بها من حصيله
وكم شيد في طيبه إلى جا مجاله
مانيب أقول إنه نفل كل جيله
أقول يبشر بالسعد من عنا له
يعطي بكفه ما يوكل وكيله
من كثر حبه للوفا والجماله
يا كثر من بالمغفره يدّعي له
الله يقبل دعوة اللي دعا له
عسى الكريم اللي يزبن دخيله
يبعد صواديف النكد عن عياله
عسى لهم بالطيب قاله ثقيله
وعدوهم يفشل ويبلش بحاله
ويالله يا مشفي النفوس العليله
تقبل سؤال اللي رفع لك سؤاله
هذا وما هل المطر من مخيله
صلوا على محمد نبي الرساله
"مدارات شعبية"