بسم الله المعبود خلاق الأجناس
رب خلق خلقه وكوّن عبيده
يا منزل القرآن ما جاء بقرطاس
نزل مع إللي له لسان يجيده
طالبك أنا يالله من صدق الإحساس
صدق المشاعر في بيوت جديدة
هاضت بي الأفكار من كل هوجاس
ساعة دريت عن الخبر فالجريدة
يا سيدي سلطان من عقب الأوناس
مأجور يا متعب بيوت القصيدة
يا سيدي مأجور وألفين لا بأس
يأبو الشهامه فالليالي الشديده
جودك وطالاتك ترى ما لها قياس
رايتك بيضاء والمواقف شهيده
مذخور لك طيبك على طيّب الساس
صقر الجزيره جاب والله وليده
للعلم علامه وللحق نبراس
فيه إسوة لأهل العقول الرشيده
حر تعلى المجد مع كل نسناس
له ماكر في قصر عز مشيده
صميدع بالفكر والرأي والرأس
حاز الجمايل والخصال الحميده
طير السعد سلطان يا طير قرناس
له مخلب يسبق على شلع صيده
يا حصننا الشامخ إليا دقت أجراس
وان دارت الهيجاء عدوه يبيده
عدونا دونه دروع مع الطاس
حمايها في كل قاله عتيده
داس المصاعب كلها بالقدم داس
ضد الضديد إليا بداله ضديده
ما عنده إلا السيف لا أخماس وأسداس
سيل الكرم جوده إليا أرخى لك إيده
رصيد أبو خالد إليا فتحت أقواس
دين وفخر مع طيب هذا رصيده
أفعال أبو خالد كما الدر والماس
سطر لها التاريخ سيره مجيده
يمناه ترفع كل درع مع الكاس
كيسان نصر وعز والله يزيده
الله يجنبه البلاوي والأتعاس
والله يديمه في حياة رغيده
والله يلبس سيدي خير الألباس
وأسال ربي له حياة مديده
وأختامها صلوا على سيد الناس
نبينا المختار صاف العقيده
"مدارات شعبية"