لا باس ياللي شامخه في معانيك
عبر الزمن من تذكار وأربع فصوله
لك واقع ما يختلف عن هقاويك
والذل ما فكرك ودعواك حوله
واللي بعد كيبك وحبك يخليك
خليه لين الوقت يلغي حلوله
لا ترخصين النفس للي يجافيك
خليه جعل الوقت يقلع ذلوله
كم له وهو في حلم عمرك يمنيك
حتى كشفتي في عيونك فضوله
بيعيه لو جالك بدمعه يناديك
طيبك لو إنه حاوله لا ينوله
خلي شموخك بالنوايب يواسيك
خلي خفوقك لو قسى الوقت دوله
وأنا معك في كل الأحوال أخاويك
وأنتي معي فيما تبين محفوله
زميلتك واختك ويدي بأياديك
ناخذ مع الأفكار جوله وصوله
اللي يعرفك في غلا القلب يشريك
وحبك بقلبه صعب يحدث نزوله
وأنا عزيزه للقوافي وأجاريك
وشعرك جميع أهل المعاني عنوله
كل المشاعر بالقصايد تناجيك
شعرك جماهيرك صحيح اهتفوله
وهذاك يا تذكار لا عاد يشقيك
من صالحك فرقى كلامه وزوله
"مدارات شعبية"