بالله يا للي يجهلك فتلت البيت
الشعر جنب عنه لا تدعي به
لا صار ما جالك على ما تمنيت
شي يفوق المقدره وشتبيبه
لا تحسب انه باللحن يوم غنيت
ترى اللحن حتى الحمامه تجيبه
ان كان بيتك ما يجي شايع الصيت
يطرب رجال المعرفه وتحكي به
فيه العوارف قالوا أصبت ما خطيت
اللي تقر المخطيه والمصيبه
وليا استمع له شاعر قال ياليت
هالبيت لي وغير هذا مالي به
افضل تريح من كلام الشواميت
والشعر ياجاهل معانيه سيبه
اطلق سراح الشعر بالخير جوزيت
ترى ارتباطك فيه ما هو غصيبه
والله لو حاله كما حالة الميت
فرقاك.. تشفي له جروح عطيبه
اترك مجاله للرجال المناعيت
تصدق معه وأيضاً بعد تعتني به
"مدارات شعبية"