ان قاله الله جيت والذل كاسيك
ثوب من الحقران عرضه وطوله
لا تحسب انك تلمس الجدي بيديك
الجدي عالي وانت يدك مغلوله
ولا تحسب اني يا خبل باعترف فيك
والا اني انسى ما فعلت بسهوله
برميك من قلبي ومن عيني ارميك
ما عاد يشفع لك كلام تقوله
رضيت والا خل الايام ترضيك
واعلى خيولك اركبه لو تطوله
تذكار ما تجهل حقيقة مباديك
لكنها كانت من اول خجوله
غطت على ما شافته من بلاويك
كانت تعيش أحلام عمر الطفوله
ويوم انها بالخبث باتت مواريك
لا ما تشرف فيك بنت الحموله
دور وتلقى غيرنا من يهنيك
واتبع هوى نفسك وإخذ زود جوله
هرج يجيبك لي وهرج يوديك
لا يا خساره وش جرى للرجوله
واليوم أنا ما عاد لي حاجة فيك
قلبي على الوحده تغيَّر ميوله
مكانتي صعب تجيها حراويك
أنا شموخي ما انت قادر تطوله
اليوم جيت أمسح نهايات ماضيك
اليوم باخذ منك دور البطوله
"مدارات شعبية"