ياحسن (*) يا طيب الفال والعلم الحسين
الشرف والعز والمجد لأهل الميمنه
في هذيك الدار والوضع واليوم الحزين
والمشاعر شي نخفي وشيٍ نعلنه
جاتني فزعة سنادي كعام العايلين
يا كريم الوجه حرم على النار بدنه
فيصل آل سعود في موقف العليا يبين
الزمان إن شح وإن جاد هذا ديدنه
وابنه محمد حميد المساعي مرتين
ذخر من لا ذخر له في المصاب يعاونه
نادر من راس نادر وباسه ما يلين
هدته تعجب وتطرب على طول السنه
جاذب الاثنين شيخ ينومس كل عين
سعود والله في الرجاجيل مطيب معدنه
سادة السادات منذ عصور الأولين
والحقايق ما تغير بطول الأزمنه
شجرة آل سعود شجره على مر السنين
ما تغير مثل ضلعٍ يزبن مزبنه
إن بغيت من الثمر مد وأقطف باليمين
وان بغيت ظلال فالظل فيها مزينه
منهو اللي مثلهم للمكارم مالكين
حازو الطولات ما في الحقيقه كنكنه
طيبكم يجزاه عنا إله العالمين
خفف الآلام وحزن القلوب المحزنه
موقف لا يمكن أنساه وأخواني أجمعين
لو نعبر عنه تعجز تقول الألسنه
"الريـاضيـة"