لا عدت يا علم لفاني بجوال
هز الخفوق وعبرتي سابقت له
بغيت احذفه ياهل العرف بالحال
ليت السموع الصاغيه ما صغت له
قالوا حكيم الشعر من منزله زال
ونزل بمنزال وحيد نحت له
يا الله عسى له جنة الخلد منزال
وثبت قلوب بالحزن ودعت له
مرحوم يا محسوب من عرض الأبطال
لا شان منطوق العدو نلتفت له
نقاض صعبات التماثيل فتال
اليا عصن بعض البشر طاوعت له
يسوقهن سوق المطايا بالاحمال
من هيبته صعب المعان اخضعت له
ياما ردع من عنجهين اليا عال
إن كان نفسه للخطا سولت له
يحط بلسانه كوالين واقفال
حتى يتوب ويترك الهجو بتله
ويوم الحقوق بضربة الكف واسلال
له هيبة ترهب عدو نعت له
سمي ببو عفريت من عقب الأفعال
من قوته من سطوة صاحبت له
ون جات بالحجه وتثبيت الأقوال
فلج خصيمه بالكلام وثبت له
ليت المنايا دورت عنه الابدال
تختار عن مدفاعنا ما بغت له
من ناس تحمل من بطاقات الاحوال
لو مات ما كل العيون اذرفت له
ما يفقده كود الحليله والأطفال
نقص على ربعه وعين رجت له
وعندي خبر بالموت قصاف الآجال
ما فيه نفس عافها ما اصلحت له
من حل لا بده عن الدار رحال
محد حياته دايمه عامرت له
مار اتحسر لاخذا الموت رجال
لو هو من الاجناب عيني بكت له
اللي بهم ستره عن الشمس واظلال
ما ترتهب كان القسا واجهت له
وهواش تبكيه المعاني والامثال
اللي صخرها غصب ما صخرت له
مع الرجال اللي لهم قدر واجلال
اللي على فعل الوفاء رافقت له
سبحان خلاق البشر ربنا العال
كل النفوس اللي خلق راجعت له
ولا مات من عقب على داره عيال
مثل الحرار وصيدها دربت له
خص اليا صاروا على مثل ما قال
اشبال من ذاك الأسد شابهت له
الله يبيحه يوم غبات الأهوال
ويغفر ذنوبه في حياة مضت له
"مدارات شعبية"