الله من قلب تلفه معاصير
دلت توقد بالمعاليق ناره
اعول عويل مهرجفات الخواوير
جرمية قامت تذكر حواره
اركوا عليها بناسعات القناطير
وخلي ولدها واقف بالمعاره
واشوف بالدنيا خراب وتعمير
ولا من عمار كود عقبه دماره
يا ناس روس الناس مثل المداوير
والخاصله قامت تدور الكباره
وتخالط السلاف هو والمضاهير
وراعي الغنم واللي ينخس حماره
يالله عسى مقسوم شانك لنا خير
يا والي الدنيا بحسن اختياره
يا منشي غر المزون المزابير
يا ما تنثر بالمداهل بذاره
يا ملحق هزل الضعاف المقاصير
عليك توصيل الرشا وانبتاره
تفرج لمن طبقت عليه المعابير
متحير وقلت عليه التجاره
صبابة البن الحمر للمسايير
مع كبش مصلاح عريض فقاره
وردادة الطوعات عند المغاتير
يوم ان عج الخيل يسمك غباره
وباقي الملا ياعلها له مسافير
لو مات جرو طايح من وثاره
الا صبي عاثرته المقادير
والمال هو باس الرجل واعتباره
لو الخلايق يجبرون المكاسير
القلب ما ترهم عليه الجباره
"مدارات شعبية"