ألا واهني اللي له الحب ما قسم
ولا الله بلاه بحب ناس يعنونه
لا يعرف الحسرة ولا يعرف الندم
ولا يعرف الضيقه ولا يسهر عيونه
ولا تخنقه عبرات عينه ولا انصدم
ولا يسرح بسجه وربعه يشوفونه
ولا فالعصير يويق في عالي الرجم
ليابان في رجم العنا باح مكنونه
وجودي وجود اللي من الوالد انظلم
إيوه ظلمه من ردي حظه ومظمونه
بعد كان صاحب جاه مع عز مع قيم
تخلوا عنه حتى هله ما يدانونه
وجودي وجود صغير ما بعد فطم
توفوا هله من قبل لاهم يربونه
فقد والدينه وابتدأ صفحة اليتم
ومع زود يتمه عمة الورع ملعونه
تولت عليه وتدفن السم في الدسم
تظاهر بطيب وشرها ما يعرفونه
على خشف ريم تلت القلب وانهشم
كما هشم زرع قربوا له يحصدونه
أنا لن طرالي طيب الذكر والاسم
تجيني هواجيس بذكراه مرهونه
وينتابني نوع من الخوف وانهزم
ومشواري اللي رحت له عدت من دونه
أبوها سخين جامع جاه مع كرم
شجيع طحاطيح الرياجيل ينصونه
ولد شايب ذكره ترسخ كما العلم
عقيد حليم كل ربعه يطيعونه
نهار الملاقى قدمه الخيل تنقسم
وله عزوة منها عداته يهابونه
وتفرح لمفزاعه هل إبل وهل غنم
وتفرح لمفزاعه ربوع يوالونه
"مدارات شعبية"