الله من قلب تزايد عذابه
والعين عيت تقبل النوم وتريح
يا الله طلبتك يا سريع الاجابه
تفتح لنا باب الفرج بالمفاتيح
يا الله برزق وانت فتاح بابه
يا خالق قوت البدو والفلاليح
النوم ساس اللوم بان الردا به
وعين تبي الطولات نومه شلافيح
واللي يدور الفود يتعب ركابه
والرزق باطراف الخطا يا اهل الفيح
الذيب ما يرقد ورزقه نهابه
يبحث عن الغرات حول المصاليح
يحمد مصابيح السرى من سرابه
بالليل الاظلم والنعايم مدابيح
تغاروا المرقاب مثل الذيابه
وتقابلوا مثل الحرار المفاليح
وانا على اللي يوم ساجن احقابه
تشدا قطاة وردوها الجواوويح
قالوا هذيك البل تسلسل حرابه
وقالوا جنبها عاشقين الطماميح
الله يلوم اللي بخاله خنابه
لاجت هروج القوم عنها تصافيح
يوم انطلق مثل الرعد من سحابه
بكفوف كوخان العيون الذوابيح
من كل مسلوب يوكد صوابه
بصمع الفرنج موميات المطاويح
كثرت مناجيهم وصارت طلابه
وجنك كما ذود لحوضه مراويح
ثور عقيد القوم ثم عدابه
لهم على عوص النجايب مشاويح
"مدارات شعبية"