شوارد الفكر لا كفكفتها غير
وان سقتها سقتها فن وحرافه
اسابق الشرد واكفخ كفخة الطير
وآخذ مع الجو جولة والتفافه
لو ان بالصدر غربة روح يا عمير
والنوم عيني لها مدة تعافه
البال تسعى به عسوس ومداوير
عن نافر الجيد من عين وشافه
اللي كلامه مثل همس النواوير
في خايع عله الغيث بلطافه
غندور لكن ما هو مثل الغنادير
المرهف اللي رهافه في رهافه
لا لامس الريح مجدوله بتقدير
تقول بينه وما بينه ولافه
سبيب شقراء خزيزة سالم الزير
يا عمير زافات زافه فوق زافه
اللي فراقه من كبار المخاسير
والربح قربه وبعده لي حسافه
لو انها سالفه بعد ومشاوير
نطوي المشاوير وتهون المسافه
ما ادري اغني على بعده مقادير
والا ياليل العناء وش هالكسافه
الطرق غلق وانا انهيته على خير
والنشر خله (لصعلوك) الصحافه
ماني من الشلة اللي تدهن السير
وانتاجها من سخافة في سخافة
تجميع ومدوزنة بأوراق تحرير
بأسلوب يغريك بأشكال الظرافه
بعض المواضيع ما تحتاج تبرير
يعني إذا شئت قل عنها لقافه
واصحابنا اللي يسمون المشاهير
حياهم الله على قل الكلافه
"مدارات شعبية"