الحويفي بدر بن عواد صح السانه
ان سمعته وان رويله وان قريت اقرايه
عرفه اللي يملي املاها على وجدانه
وعقله اللي يستحيط اقصا شمول ادرايه
كلّ راوي من رواته رمز عن عرفانه
وكلّ مجلس ذات قيمه له ثنى واروايه
والشعر عالي شموخه ثابته سيسانه
له شموخ وله محيط وله حدود حمايه
صفوتن من كلّ جيل تعد عزّ أركانه
روس توليه هتمام وتعتنيه رعايه
والحويفي من معالم عالمه واعيانه
وقفته في ساحته حسنه وبعده سايه
يا بدر هزّ المشاعر ما قريت اعلانه
وهاض فيض من الهجوس ولا عليك كمايه
طيّ قيدك للقصيد اكبر سبب خسرانه
ونت عرفك فوق داعي معرفه ووصايه
في وجودك يستعزّ ويرتفع بنيانه
لعترافي دوك مني بصمتي ومضايه
والشعر بحره عميق وحايطه حيطانه
والنبط فرع الفصيح ولا عليه حضايه
الشعر ماهو لفكر اهل الشكوك ارهانه
لا رهينٍ لعتراف ولا رهين شنايه
من نقد جاحد سما عن مستوى جحدانه
ما تزلزل من هجوم ادنا ضليل هدايه
عالي شعر النبط عن سيته وحسانه
ثابت السيسان شامخ عن شكوك التايه
عن صموده ما تهزه شوشرت شذانه
ولا على روس العوارف من شمات وشايه
وان تشبث فيه من عنده عما بالوانه
تايهٍ غاوي بروز اسم ولقب وكنايه
يا بدر هزله يموت ولا تموت سمانه
يكتب ايراع الخفيف وتتبعه محايه
كان عرفه ما فرق من جوهره مرجانه
الخطوط البارزه قمة رزا الزّرايه
لو خضع راس القلم طايع لروس أبنانه
لاخلد ليراع حرف ولا عيت برايه
الخطاب المارده من مصدره عنوانه
يا بدر والعلم منك اليا وصلك كفايه
"مدارات شعبية"