يا شبل يا لا هي عن اللي يناديك
توك على سجات الأفكار توك
بدري عليك الله من الخير يعطيك
ويكفيك بمره سو غيرك وسوك
يمديك كان إن الله أمهلك يمديك
لا زلت في فترة صباك ونموك
إن كانها أيامك طوال ولياليك
والله ليلفنك على جال ضوك
ثم خلها تفتكك حيلك ويديك
ويدين من حولك ومشط المشوك
أفكار لعلي الجاذبيه توديك
وافكار تهويبك حدر من علوك
وافكار منها الله وانا ابوك ينجيك
جلدك يكش وشعر راسك يشوك
واشياء كثيرة تاتغير هقاويك
توقضك من نوك ولحظة هدوك
مامرني ماهوب أكيد متعديك
عدو ابوك يصير بكره عدوك
يبلاك في نفسك ويدهاك ويجيك
لوك تبي فرقاه وش عاد لوك
علمي وحطه واحفظه بين اذانيك
وخله على بالك ليا شان جوك
تذكره، قل قاله ابوي في ذيك
الليله اللي كنت فيها مصوك
"مدارات شعبية"