خلوا عيوني تنثر الدمع سكاب
ما ألو مها لو هلت اليوم ماها
ان كان ما تبكي علىفقد الأحباب
لعل ما يبطي عليها ماها
أبكي على اللي حط من فوقها أنصاب
أمي عسى ربي يطيب ثراها
وجدي عليها وجد من طاح منصاب
واجه خصوماً منه تبغى قضاها
ولا وجود اللي عجز عنه الأطباب
به علةٍ محدٍ وصف له دواها
مافاد به طب الدكاتر والأعشاب
طول عليه الوقت يرجو شفاها
يمه أنا قلبي حزينٍ ومنصاب
نار الحزن وسط الضماير كواها
عليك يوم العيد شققت الأثياب
والعين عقب مفارقك يا عناها
بنتك نهار العيد عنها الفرح غاب
ثوب الحزن هو ثوبها إللى كساها
ما أبي العوض فأمي بعيدٍ ولا أقراب
لأمي مكانة ما تليق بسواها
بيبقى مكان أمي وأضمه بالأهداب
ويضمها قلبٍ حشاما نساها
عزاي فيها الموت حقٍ بالأرقاب
سكة جميع الناس تمشي معاها
وآمنت باللي جاعلٍ أجل وكتاب
النفس يخلقها وإن شاء خذاها
واستغفره انه غفور وتواب
يغفر خطا نفسي ويجبر عزاها
"مدارات شعبية"