حبيبي طالت الغيبة.. وأنا عايش بدون شعور
أنا عقبك تثاقلت البشر والنفس مشقيها
أنا عقبك كما ليلٍ حزينٍ ما يجبه النور
ظلام وخوف وأحلامٍ عجزت أفهم معانيها
أنا عقبك كما طفلٍ غرير ما يطيع الشور
يطلّق خطوته من وين ما راحت يمشيها
أنا عقبك كما أرضٍ وسيعة والجروح قبور
ألا ليتك تشوف جروح خلك وش حصل فيها
أطيح هناك.. وهنيا يطيح الخاطر المكسور
وأقوم أجمع بقايا حسرتي وألقاك ترميها
أمانة لا تخليني حزينٍ طايح مقهور
ولا تترك جروحي حايرة محدٍ يواسيها
أنا كنت أحسبك تجمع حطامي لا غدى منثور
ولكنك على ما قيل.. حاميها حراميها
على طاريك تهتز المشاعر والجروح تثور
على طاريك ماتت فرحتي بأول ثوانيها
حبيبي طالت الغيبة.. وأنا عايش بدون شعور
أنا عقبك تثاقلت البشر والنفس مشقيها
"مدارات شعبية"